و بينما الثلاثة أصدقاء يتحاورون مرت فتاة شابة ترتدي بلوزة قصيرة تظهر جزءا من بطنها و بنطال من الجينز الضيق به بعض الخربشات من عند الفخذين ليظهر ساقيها ، قال عبده بعدما نفث دخان الشيشة من أنفه : حريم آخر زمن بس هقول ايه العيب مش عليها العيب على اللي سابها تنزل من البيت كده .
فقال له عمر بعصبية :وانت مالك يا عم هي حرة
عبده: حرة ايه ياعم أنت شايفنا قاعدين فجاردن سيتي و لا مارينا.
عمر : يا عبده انت شايف احنا سنة كام لازم يكون في تحضر و احترام لحريات الناس
عبده : هو لازم عشان ابقى متحضر اقلع مراتي و اخلي اللي يسوى و اللي مايسواش يبصلها .
عمر: ما ترد يا أستاذ يا مثقف ولا فالح بس كل شوية قاعد تقرالنا فكتب.
محمد :والله أنا شايف أن عبده مقالش حاجة غلط
عبده : أنت رجل مية مية .
عمر : لا أنا شايف أنه غلط و مش من حقه يتدخل فلبس حد أيا كان .
محمد: بص يسطا أنت فاهم الحرية غلط ، أول حاجة كل واحد حر يلبس اللي هو عاوزه تمام أنا معترضتش بس حريتك دي بتنتهي عند حرية الآخرين . "أنت حر مالم تضر"
عمر: طب هو ايه المؤذي فبنت لابسه براحتها و ماشية عادي ؟
ضحك عبده قالاً :لا ما المشكلة أنها مش لابسه .
محمد: أيوه زي ما عبده قال هي مش لابسه .
عمر: لا يسطا هي لابسه بس عشان اللبس مش على مزاجك بتنتقدها ولو مش لابسه خالص مش من حقك بردو.
عبده : مش لابسه خالص ازاي لمؤاخذه
محمد : بص يا عمر أنا عارف أن كلامي مش هيعجبك بس في حاجة اسمها عادات و تقاليد و في الأهم منها وهو الدين و ده مديني الحق إني اتدخل .
عمر : أمال بتقولي إنك فيمنيست ليه يعم ما أنت تفكيرك زيهم .
محمد: أنا مقولتش إني فيمنيست أنا بدافع حقوق المرأة
عقد عبده حاجبيه في حيرة ثم قال : لا استنى بقى عشان أنا توهت منكو هما مش الاتنين حاجة واحده ؟
عمر : اه المفروض .
محمد : لا استنى هفهمك في فرق كبير اوي أنا عارف أن الاتنين نفس المعنى بس الفكرة أن الناس اللي مسميين نفسهم فيمنيستس هما هما اللي بيدافعوا عن الشذوذ و هما هما اللي بيشتموا فالاديان و المجتمع .
عمر : طب و أنت ايه مشكلتك مع الشذوذ ؟ و عامة اللي بيشتموا فالأديان و المجتمع لانه بيبقى ظالم لبعض الناس .
عبده : شذوذ ! قوم يلا من جنبي
قال محمد مازحا : أوعى تطلع شاذ يا عمر .
عمر : لا يعم ولا شاذ و لا حاجة بس مينفعش تبقى عنصري كده
محمد : بص اسمعني للآخر احنا مبنتكلمش فالشذوذ دلوقتي ، انت بتقولي ايه الفرق بين الفيمنيستس و اللي بيدعموا حقوق المرأة بكل بساطة أنا قلتلك أن الفيمنيستس بيدعموا الشواذ في حين أن الفيمنيزم هو الدفاع عن حقوق المرأة عامة و ليس الشواذ ،حاجة كمان هما بيشتموا فالأديان و المجتمع و دي حاجة مش عاجباني افرض أنا انسان متدين و مبحبش الشواذ و عاوز ادافع عن حقوق المرأة ايه الغلط فكده؟ و كمان الفيمنيستس بتوع اليومين دول ميعرفوش حاجة عن الفيمنيزم أصلا ولا عمرهم قرأوا كتاب واحد عنه و بيدافعوا عن حقوق هما بالفعل واخدينها زي الحق في التعليم او العري ما تقلعي بس مش لازم تطلعي تطالبي فحقك باقلع معلش يعني في مجتمع و المجتمع ده لازم تحترمه غصب عنك اعتبر نفسك فدولة غريبة مش هتحترم عاداتهم و تقاليدهم حتى و إن كانت بالنسبالك تافهة و غلط .
عمر : مش هتكلم عن الشذوذ عشان انا عارف موقفك منه ، بيشتموا فالأديان و المجتمع لأنهم شايفين إنه بيظلم المرأة ، وليه بتتكلم عن القلع كأنه جريمة هي لو كل بنت لبست براحتها هتأذيك فيه ولا هتأذي معتقداتك فأيه ؟ هي حتى لو لابسة نقاب او محتشمة هيتحرشوا بيها .
محمد: الدين مظلمش المرأة فحاجة بالعكس ده كرمها اه ممكن بعض المجتمعات فيها ظلم و في أهالي مبيخلوش بناتهم يتعلموا و في حاجات كتير غلط بس اختلف معاك فموضوع اللبس أنا قلتلك قبل كده الواحد مجبر يحترم المكان اللي هو في و يحترم عادات و تقاليد الناس حتى لو بالنسباله غلط و لنفترض مثلا إنك سافرت الهند و قعدت فمدينة أهلها بيعبدوا البقر طبعا دي حاجة تافهة و غلط بس هما كده و أنت قاعد عندهم ينفع تطلع تدبح بقرة؟ هيدبحوك بعدها هي دي الفكرة مينفعش تخالف عادات و تقاليد المجتمع اللي أنت فيه عشان ببساطة "أنت حر " في حاجات مينفعش تكون حر فيها ، لو جينا للتحرش فده ظاهرة موجودة ولازم يركزوا أكتر فعقاب المتحرش و إن الست تطالب بحقها فعقاب المتحرش سواء كانت محتشمة أو لا التحرش أو الاغتصاب عمر الغلط ما كان على الضحية بس بدل ما يطالبوا بحقهم فالعري يطالبوا فحقهم في عقاب المتحرشين .
عبده : ما أدبح براحتي ياعم ده أنا أحسن جزار فالمنطقة قال يدبحوني قال .
محمد: أنا بقول تدبح عمر عشان صدعني .
عمر : ليه كده بس ده أنا كنت لسه هقولك بدأت اقتنع بكلامك بص أنت صح فموضوع المجتمع مينفعش يتغير و مش هنقدر نغير الناس بس أنا عند رأيي أن لا الدين ولا الإنسانية يسمحولنا أن احنا نأذي حد عشان مش على مزاجنا .
محمد : أنا طول كلامي مقولتش نأذي حد ولا عمري بأذي حد الواجب عليا إني انصحه مقبلش النصيحة براحته بس أنا مش مجبر أقبله ولا أقبل حاجات بتخالف عاداتي و ديني عشان هو حر لا حريته بتنتهي لما يأذيني .
أتى سيد بصينية عليها عدد من أكواب الشاي التي لا أستطيع عدها ثم وضع ثلاثة منها على الطاولة التي يجلس عليها الشباب فقال له عبده : ألًا قولي يا سيد أنت فيمنيست ولا بتدعم حقوق المرأة ؟